بقلم : راندا يونس

وانا بتصفح الفيس بوك لقيت سؤال بيقول الناس اللى جات على نفسها عشان المركب تمشى.. أخبار المركب إيه؟ طبعا إجابات مختلفة شوية منها صادم وشوية ساخر وشوية جد.

وطبعا زى عادتى سألت نفسى السؤال وجاوبت عليها هو الواحد لازم يجى على نفسه ويضحى عشان المركب تمشى، ومش شرط السؤال يكون خاص بحياتنا الشخصية ممكن يخص شغلنا ممكن يخص علاقتنا بالناس اللى نعرفهم، وهل لو فعلا جينا على نفسنا وضحينا وعدينا هايبقى ليه تقدير عند الناس اللى ضحينا عشانهم؟

فكرت شوية ولاقيت إن مش كل الناس تستاهل إننا نضحى عشانها لو ده هايكون على حساب نفسنا، ليه مطلوب مننا نتعب ونضحى ونستحمل حتى لو عشان حد بنحبه، ليه نضغط على أعصابنا وتفكيرنا لمجرد إن المركب تمشى.. عنها مامشيت، نركن وننزل منها وأكيد هانقابل حاجة توصلنا للطريق اللى نحبه ونرتاح فيه.

ماتجيش على نفسك أوى عشان المركب تمشى لإن مش كل زيادة حلوة، الزيادة فى التضحية مش حلوة، الزيادة فى الثقة مش حلوة، الزيادة فى حرمان النفس عشان خاطر الناس مش حلوة، لإنك ببساطة لو مكنتش سعيد ومرتاح مش هاتعرف تسعد اللى حواليك وساعتها المركب هاتغرق بيك وبيهم.