بقلم الدكتوره :غادة الشرقاوى

تشيل هم الناس حاجه و انك تشيل الهم عنهم حاجه تانيه خالص

يعني ايه الكلام ده …يعني

التعاطف مع الآخرين مشاعر نبيله وان قلبك يبقي علي غيرك دى انسانيه ورحمه وانك تقف جمبهم في مشاكلهم وهمومهم وافراحهم مسؤوليه وواجب عليك والدعم النفسي في الأوقات الصعبة مبيتنسيش والسعاده وحب الخير للغير أصول ..

الناس اللي تستحق ده هتلاقيهم بيبادلوك نفس السلوك في مواقف مختلفه وهيحطوك في قلبهم وعمرهم ماهينكروا جميلك وهيفخروا بوجودك بحياتهم

بس خد بالك باه من الغلطه الكبيره اللي بنقع فيها..

انك تشيل الهم عن صاحبه يعني تتصدر في حل مشاكله بدون طلب منه او انك تعيش حياتك بمشكلته قايم نايم بتفكر في همومه وكيفيه الحل او …… انك تشيل عنه مسؤوليته ودى بقي الكارثه

إذا عملت كده مع الشخص الغلط  هتندم أشد الندم لانه هيعتبره حق مكتسب ليه ويوم ما تقف هيقول عليك مقصر ويوجعك بكلامه وعلي فكره هو مش هيبادلك حاجه لانه اتعود ياخد ميديش وأما هتخلص حاجته عندك هيشوف غيرك للاسف

أما تاخد هم غيرك بالأحضان وتعيشه كأنه همك انت هتتعب وهتمرض وهتمر بكل المشاعر السلبيه ( لا يكلف الله نفسا إلا وسعها ) كل واحد عنده شيلته اللي علي قده فبلاش تدخل بصدرك في ابتلاء غيرك أتعلم ازاى تكون داعم ليه مش شيال ليه كل واحد فيه اللي مكفيه ..

دمتم سالمين