بقلم : راندا يونس 

كل لحظة بتمر على كل واحد فينا احساسها بيكون مختلف وأمنياتها كمان مختلفة، وكل واحد بيعشها حسب حالته النفسية يعنى لو لحظة حزن بنحس إنها تقيلة اوى وبتمشى ببطء لكن لو لحظة فرح أو سعادة بنحس انها بتمر أسرع من الهوا ولو لحظة خوف بنحس إن الوقت اتجمد فى مكانه ورفض يتحرك، بس فى الآخر كل اللحظات بتعدى بحلوها ومرها وجمالها وقسوتها بس وهى بتعدى بيجرى عمرنا معاها.

ووسط كل اللحظات دى بنتغير من غير مانحس من غير حتى مانقرر اننا نتغير يمكن عشان عشنا لحظات قاسية أكتر ماكنا نتخيل واتحملنا فوق طاقتنا أكتر من قوة تحملنا او يمكن عشان اللى حولينا بيتغيروا أو وقعنا فى حفر كتير وملقناش اللى يطلعنا منها وعافرنا لحد ماطلعنا لوحدنا وده اتسبب ان حاجات اتكسرت جوانا ومش هينفع ترجع تانى ويمكن عشان عرفنا حقيقة ناس كتير حولينا كنا مخدوعين فيهم وغير كده حاجات كتير…

الخلاصة إننا بمرور الوقت بنتغير سواء برضانا او غصب عننا وممكن نبقى شخص مختلف خالص مش شبهنا أصلا، بس المهم إننا نتغير للأحسن ونتعلم من كل موقف حصلنا وكل مانقع نتعلم ازاى نقف من تانى ونكون أقوى من الأول بس ماننساش واحنا بنقوم الناس اللى مدت ايدها وساعدتنا ونحطهم فوق راسنا، وفى نفس الوقت ماننساش الناس اللى وقعتنا واذتنا ووقفت تتفرج علينا واحنا بنقع الناس دى لازم الأول تشكرهم إنهم علموك درس عمرك، وتانى حاجة تخرجهم برة دايرة حياتك خالص من غير حتى ماتقولهم سلام.