صوت الحنين

صوت الحنين جواك يخبط
في الذكريات
وسط الكلام ووسط السكات
وسط تنهيده إشتياق
ووسط صدمة عمر فات
صوت ضحكه حلوه في عز
أوقات الهنا
وسط الغنا والدندنه
وسط البكا ويا الأهات
صوت الحنين جواك يخبط
على البيبان
يمكن نلاقي وسطهم كل اللي كان
ولا نلاقي في الوشوش حبة أمان
نهرب بيهم من مُر عشناه زمان
لا منه مَر ولا أصبح كان
صوت الحنين جواك يخبط
على كل كلمه حنينه
ولا ضحكه كانت صافيه
كانت زمان متعشمه
في بكره يجي ومعاه هنا أد السما
صوت الحنين جواك يخبط وساعات يلخبط
وساعات يتوه من الألم
وساعات بينساه الندم
وساعات بيحلف من الليالي ينتقم
وساعات يسلم لكل دمعه
حزينه نازله جوه حلم
صوت الحنين لما يخبط
بينزل على القلب الف سهم..