كتب  : عبدالله هيثم 

عن الطموج والايمان بالموهبة ومشواره الفنى ى من بدايتة وعمله كورال خلف الفنان محمد الحلو نشر الفنان رامى صبرى بوست على صفحته الشخصية بموقع التواصل الاجتماعى فيس بوك مدعما صورة لبدايتة وصورة له فى الوقت الحالى وانه من اهم نجوم الغناء فى الوطن العربى  متحدثا عن الطموح وقد كتب التالى :

صوره من ٢٣ سنه تقريبا الفرق بنهم كبير جدا في الصوره اللي فوق كنت بشتغل كورال مع الفنان الكبير محمد الحلو . وكنت وقتها ببتدي اشتغل علشان افهم يعني ايه مسرح وجمهور واذاي اتعامل مع الناس في الشغل . وكنت دايما عارف انها مرحله ( تعليميه ) وهاتمشي مش هقف عندها علشان كده مكانش عندي طموح فيها . فضلت اشتغل كورال مع معظم النجوم ساعتها لحد ما لحنت لفضل شاكر وعامر منيب الله يرحمه وبعدين شيرين اول ما ابتدت . وكل ده عارف ان هدفي لسه مجاش .

الصوره اللي تحت بعد كل اللي فات والتعب والمجهود الكبير جدا ربنا كرمني كرم كبير جدا وميزني  من وسط فنانين كتيره جدا وخلاني اكون واحد من اهم نجوم العالم العربي

الموضوع كله صدقني في ( الطموح ) لو انت بتحب نفسك ومأمن بنفسك وعندك الاصرار انك هتوصل لمكان انت مش فيه دلوقتي

صدقني هتوصل بس تصدق نفسك

ومفيش حاجه اسمها ( حظ) دي كلمه محصلتش معايا

مع حبي للموسيقي وطموحي وانا ماشي فيها في واحد معايا في نفس الصورتين وهو أخي وصديق العمر والموزع الموسيقي وعازف الكيبورد الاستاذ محمد سمير . هو كمان طموحه كبير جدا وابتدي معايا في الصوره اللي فوق لحد ما بقي احد اهم موسيقين مصر وبيلعب مزيكا  مع اهم نجوم عالمنا العربي

ولسه مكمل معايا من ٢٣ سنه لحد الان وهو مدير فرقتي الموسيقيه

عاوز اقول في الاخر طموحك وحبك لنفسك هايوصلك . ماترميش شماعه الظروف علي نفسك وتقول ظروفي وحظي وتدخل في مود مش هايوصلك لحاجه .

هاتوصل هاتوصل صدقني اشتغل علي نفسك اوي وحط في نفسك انك اهم واحد في العالم ولازم الناس كلها تعترف بيك . واول ما هاتنجح كله هيجري وراك ويسقف لك

الفرق بين الصورتين ( الطموح فقط)

صباح التفاؤل والنجاح 💪❤️