بقلم : راندا يونس

وانا فى رحلتى اليومية على صفحات الفيس بوك اتكعبلت فى سؤال لفت نظرى بيقول: تفتكر الحب بيموت؟ وطبعا بذكائى المعهود سألت نفسى السؤال وفكرت إن إجابته سهلة أوى لكن اكتشفت إن الإجابة صعبة وبتوجع كل مافكر فيها.

الحب نظريا مش كائن حى عشان يعيش أو يموت لكن فى الواقع الحب أكتر حاجة بتمثل الكائن الحى فعلا يعنى بيتولد وبيكبر وممكن يمرض ويعجز ويموت، الحب كائن حى زى النبات بالظبط طول مابتسقيه وتراعيه بيكبر ويرعرع ولو سيبته من غير ماترعاه هايدبل ويموت.

للحب معانى كتيرة بتختلف من واحد للتانى وعلى حسب التجربة اللى عاشها وسيطرت على كيانه وحياته، الحب احساس يطلعك لسابع سما فى لحظة وممكن ينزلك بعدها لسابع أرض، الحب الحاجة الوحيدة اللى ممكن تحسسك انك لسه عايش وجوه قلبك نبض، وبردو هو الحاجة الوحيدة اللى لو ماتت بتاخد روحك معاها وتعيش ميت طول حياتك، الحب هو الحاجة الوحيدة اللى فيه كل حاجة وعكسها يعنى فرح وحزن عياط وضحك احتواء وهجر أمل وخيبة أمل حياة وموت.

نرجع لسؤالنا هو الحب بيموت؟ ايوه الحب بيموت اما يطعن بسكينة الاهمال وعدم الاهتمام أو يطعن بسكينة الخيانة والغدر أو يطعن بسكينة الظروف والحجج الفارغة، الحب بيموت لو ملقاش مقابل ليه وايد تساعده يكمل الطريق، الحب بيموت لو ماترواش من الحنية والطبطبة، الحب بيموت لو ملقاش السند اللى يترمى عليه، ساعتها الحب بيموت وبيتنسى كأنه ماتولدش ولا شاف النور.

عشان كده أما تحب ماتحبش أوى عشان ماتنجرحش أوى، ماتديش كل اللى فى قلبك عشان لو الحب مات يفضل شوية فى قلبك تعرف تعيش بيهم.